DILI, STLTIMORLESTE.com – Licypriya Kangujam, enviadu espesial Prezidente Republika, Jose Ramos Horta nian no ativista ambiente ho tinan 13, halo ona doasaun piano 10 ba eskola no igreja sira iha Timor laran tomak hanesan parte ida husi ninia esforsu umanitariu sira neebe halao hela iha Timor Leste.
Kangujam esplika katak, inisiativa nee mosu husi pedidu sira neebe nia simu durante nia vizita anterior mai Timor, bainhira labarik sira espresa sira nia nesesidade ba instrumentu muzikal sira.
Doasaun ikus liu ida nee harii iha Kangujam nia kontribuisaun anterior sira ba nasaun, neebe inklui bola futebol 100, laptop no sasan eskolar sira. Maske nia idade sei joven, adolesente indiana nee iha nafatin kompromisu hodi apoia dezenvolvimentu juventude Timor Leste nian, hodi afirma katak nia hakarak kontinua Prezidente Horta nia legadu liu husi projetu umanitariu sira nee.
Kangujam sublina nia kompromisu atu ajuda dezenvolve oportunidade ba joven sira Timor Leste nian, maske dala ruma hasoru dezafiu tanba nia idade. Joven defensor dame nian nee mos destaka nia servisu iha nia rain Índia, iha neebe nia estabelese ona sentru informasaun dame nian ida hodi halao nia misaun umanitaria.
Kangujam nia esforsu sira reprezenta ezemplu notavel ida kona-ba lideransa juventude iha dezenvolvimentu internasional no interkambiu kultural, hodi kria ligasaun sira neebe dura entre Índia no Timor Leste liu husi edukasaun no arte sira.
(eme)
