DILI, STLTIMORLESTE.com – Munisipiu Ermera hahu halao preparasaun ba selebrasaun loron Proklamasaun Independensia 28 Novembru, no tau ona orsamentu rihun US$ 5 .
Prezidente Autoridade Munisipiu (PAM) Ermera, José Soares hatete, selebrasaun loron Proklamasaun Independensia 28 Novembru nee kada tinan selebra hanesan deit, tanba nee loron nasional sempre aloka osan ba iha neeba, neebe loron boot nee hanesan 28 Novembru, 20 Maiu, 30 Agostu no seluk tan.
Tuir nia, iha Munisipiu Ermera tau ona osan ba loron Proklamasaun Independensia 28 Novembru, karik nia volume nee boot liu tan nee sei apoia husi Ministériu sentral.
“Ba Ermera kada tinan ami tau US$ 5.100 fahe ba Postu sira hotu, maibe agora nee Postu mos aumenta neebe sei sae tan oituan, tanba uluk postu 5 tau US$ 5.100, nee fahe kada Postu hetan US$ 700 resin, iha Kapital mak hetan Mil resin”, katak PAM, José Soares ba STL, iha PN, Dili, Kuarta (23/10/2024).
Nia dehan, selebrasaun nee kada tinan selebra iha kada Postu. Agora preparasaun lao hela, tanba besik tama ona ba Novembru, tanba née paskibra mos komesa prepara ona atu isar Bandeira.
Aleinde nee, sei iha mos atividades ba animasaun mos sei iha.
Ho komemorasaun nee hanesan buat ida atu fundamentu hodi fo hanoin ba sidadaun hotu, hodi relembra fali aktus hotu neebe durante nee povu halo iha tempú rezistensia mai too ukun aan.
(gui)
