DILI, STLTIMORLESTE.com – Prezidente Tribunal Rekursu (PTR) deklara, kona-ba kazu sira neebe mak durante pendente hela iha Tribunal, nia parte sei esforsu hodi solusiona.
“Kazu pendente barak laos tanba Juiz sira la servisu, maibe pendente tanba prosesu loron-loron nee tama hela deit,” dehan Prezidente Tribunal Rekursu, Afonso Carmona ba jornalista sira iha Kaikoli, Tersa (27/01/2026).
Nia hatutan, kazu iha Ministeriu Pupliku barak, entaun akuzasaun loron-loron tama iha Tribunal, nunee nia numeru bele influensia ba numeru pendente no Juiz bele reduz maibe dala ruma prosesu foun tama atrapalha nia numeru sae derepente.
Carmona akresenta, esforsu hela atu Juiz estajiariu nain 12 agora estajiiu hela nee, bainhira termina sira nia estajiu fo kazu ba sira kaer atu sira mos bele deside no envolve ajuda hodi redus numeru pendente.
“Kazu pendente nee mos laos tanba julgamentu baibain, dala ruma mos kazu sira neebe deside ona nia tempu kumpri pena seidauk hotu entaun nia tama hotu iha pendente,” dehan nia.
Carmona dehan, hamutuk ho sekretariu sira sei tun ba Tribunal Judisial Primeira Instansia atu oinsa mak ofisial sira loke prosesu hodi haree, tanba tuir lo-loos pena neebe deside tiha ona sei rai hela, agora sira loke destinsaun para reduz kazu pendente nee. Tanba nee iha tinan nee sei loke prosesu hodi ofisisial sira atu haree kazu pendente nee sae nafatin ga tun.
Iha fatin ketak, Jurista Jose Maria Guterres dehan, redus kazu pendente importante tebes, maibe tenke aumenta numeru autor judisiariu nian.
“Importante duni redus kazu pendente neebe iha, maibe tenke aumenta numeru autores judisiariu sira nian, hodi nunee prosesu neebe tama distribui kedan ba sira atu bele julga,” dehan nia.
Nia informa, redus kazu pendente sai mos hanesan parte importante ida atu publiku labele kestiona servisu Tribunal.
(ter)
