DILI, STLTIMORLESTE.com – Eskola Sekundáriu Jeral 10 Dezembru Komoro, husu atu aumenta profesores nain 8 ou 10 ba sira nia eskola.
Liafuan nee haktuir husi Diretor Eskola Sekundariu Jeral 10 Dezembru Komoro, Manuel Verdial ba jornalista STL iha nia knaar fatin Komoro, Kuarta (01/10/2025).
Nia dehan, 67 profesores mak eskola halo ona quadro pesoal, hein hela profesor sira bolsa kandidatu atu nunee bele koloka mai quadro pesoal neebe iha.
“Ami presiza atu aumenta profesor ba materia português, maibe tuir lo-loos nee kuandu ita halo ona alargamentu edukasaun nivel teritoria,” nia deklara.
Nia hatete, nee duni ba oin sira presiza tan profesores ba materia rua ou tolu tan, tanba sira nian profesores nain rua mak atu tama ba idade reforma ninia.
Iha parte seluk, Diretor Eskola Sekundariu Jeral 4 Setembru Balide, Sergio A..da Cruz dehan, profesores nain 5 neebe mensiona nee iha tinan 2026, sira tama iha reforma obrigatoriu ninia. Daudaun nee ME loke hela vaga, liu-liu sira neebe pasa iha bolsa nee bele koloka mai eskola neebe menus profesores no substitui fali profesores reforma.
Jornalista: Jacinta Sequeira
Editora: Domingas Gomes
