DILI, STLTIMORLESTE.com – Estudantes husi Eskola Sekundariu Jeral nu. 4 de Setembru Balide ho eskola Sekundariu Nobel da Paz sei kria jogu amizade, atu nunee estudantes bele konhese malu, evita husi problema.
Lia hirak nee hatoo husi Direitor ESJ nu. 4 Setembru Balide, Sergio A. da Cruz ba STL iha nia knaar fatin, Segunda nee (23/03/2026).
“Eskola 4 Setembru ho eskola Nobel da Paz, ami sira nuudar edukador, direjente iha hanoin ida neebe mak labarik sira nee hanesan jerasaun foun ami nian dever no knaar nee mak oinsa atu edukasaun no prepara sira ba iha futuru, maibe nee depende fali ba iha familia uma laran, eduka sira oinsa mak sira sai fali mai liur nee aplika fali buat hanesan nee, tanba husi eskola la hanorin estudantes sira hanesan nee,” dehan nia.
Nia dehan, nuudar direjente husi eskola ida nee nafatin fo hanoin ba estudantes sira katak, profesores ho direjente husi ESJ no 4 de Setembru ho eskola Nobel da Paz nee ida deit, oinsa atu prepara estudantes neebe mak diak iha futuru, ba sira nian famÃlia, sosiedade no nasaun.
“Bainhira iha CCTV detekta estudantes nee halo problema mak la perdua, entrega ba polisia, se bele hasai eskola entrega ba inan aman, nee iha formatura hau sempre koalia hanesan nee, maibe ami sei buka tempu ida para atu bele kria jogu amizade entre estudantes husi eskola rua neebe ohin mensiona,” katak nia.
Iha fatin la hanesan, Diretor Eskola Sekundariu Nobel da Paz, Jeremias P. de Jesus hatete, Eskola Nobel da Paz sei halo akordu ida ho Eskola Sekundariu nu. 4 Setembru atu nunee evita problema estudantes husi eskola rua refere.
“Hau hanoin eskola Nobel da Paz sei halo akordu ida ho Eskola Sekundariu nu. 4 de Setembru nunee evita problema estudantes husi eskola rua refere,” nia esplika.
(jac)
