DILI, STLTIMORLESTE.com – Kada tinan Eskola Sekundariu Jeral nu. 4 Setembru Balide la halerik ba konsesaun eskolar, tanba osan refere sempre tarde.
Lia hirak nee hatoo husi Diretor Eskola Sekundariu Jeral nu. 4 Setembru Balide, Sergio A. da Cruz ba STL iha Balide, Sesta nee (20/03/2026).
“Kona-ba konsesaun eskolar ba tinan ida nee, husi Ministeriu Edukasaun seidauk aloka mai eskola sira, tanba tinan tinan orsamentu sai tarde mak kada eskola iha nia maneira oinsa atu bele responde ezame, atu nunee ezame nee bele lao diak no susesu, tanba osan konsesaun mai tarde. Nee duni tinan tinan eskola 4 Setembru la halerik dehan osan konsesaun laiha, depois atu fo impaktu ba ida nee ou ida nee ba,” katak nia.
Nia hatutan, entre direjente husi eskola no nasional inklui munisípiu, sira sempre fo hanoin ba malu, konsesaun eskolar ba eskola públiku nee kada estudantes US$ 2, bainhira osan nee sai sei tau prioridade ba atividades ezame agora daudaun ninia.
“Depois sei haree ba administrasaun ninia, ami nian sala balun monta hotu ona projetor, hein deit ninia layar, ida nee mak eskola seidauk tau iha turma laran, nomos sei hadia janela no odamatan balun neebe mak presiza hadia didiak,” nia esplika.
(jac)
