DILI, STLTIMORLESTE.com – Eskola Sekundáriu Jeral no 4 Setembru Balide sei la simu estudantes neebe mai husi munisípiu, hodi kontinua estudu sekundariu iha Kapital Dili.
Diretor Eskola Sekundariu Jeral no 4 de Setembru Balide, Sergio A. da Cruz dehan, simu estudantes foun sei haree ba sala ensinu aprendizajen ninia.
“Ami simu estudantes foun sei haree ba ami nian sala ensinu aprendizajen ninia. Neebe ita nian estudantes husi Munisípiu mai la simu, tanba bazea ba despaisu husi ME katak, la simu estudantes mai husi Munisipiu, tanba nee ami simu deit ita nian estudantes iha Kapital Dili,” dehan nia ba STL, Kinta (11/12/2025).
Iha fatin seluk Diretur Eskola Baziku Central (EBC), Manleuana, Carlos Correia hatete, sira simu estudantes foun haree ba iha sala no fasilidade eskola nian neebe mak sira iha, tanba sira nian sala de aula balun neebe dadaun nee atu halo hadia. Nunee sira simu estudantes foun presiza haree ba asuntu Ida nee.
“Daudaun nee ami seidauk simu estudantes foun no ami sei simu estudantes foun iha loron Sabadu semana ida nian laran, maibe ami simu estudantes foun bazea ba ami nian sala ensinu aprendizajen neebe ami iha.Konaba estudantes neebe mai husi Munisipiu, nee presiza fo informasaun neebe klaru,” nia esplika.
Nunee mos Direitor eskola Sekundariu Jeral 10 Dezembru Komoro, Manuel Verdial hatete, estudantes neebe mak husi Munisípiu atu mai kontinua estudu iha Dili, nee tenke fo deklarasaun neebe mos lolos ba eskola, maibe sira nian preokupasaun maka nee,sala de aula limitadu. Sekuandu Dili deit mos limiti hanesan ohin, nee duni ba oin tenke haree didiak ida nee.
Jornalista: Jacinta Sequeira
Editora: Domingas Gomes
