DILI, STLTIMORLESTE.com – Profesores kada materia husi Eskola Sekundariu Jeral FINANTIL hahu prepara ona pontus ezame III periodu ba estudantes sira.
Liafuan nee hatoo husi Diretor Eskola Sekundariu Jeral FINANTIL, Aniceto Berlelo ba jornalista STL iha nia knaar fatin Aimutin, Segunda (10/11/2025).
“Ami nian profesore sira prepara hotu ona pontus ezame ba III periodu ninia. Ami nian estudantes 500 resin mak sei partisipa iha ezame III periodu, ezame nee sei halao iha loron 17 too loron 22 fulan nee. Ezame nee rasik halao durante semana ida nia laran, nee duni ami nian profesores hatama hotu ona pontus ezame,” tenik nia.
Nia dehan, husu ba kada estudantes idak-idak tenke prepara aan ho diak para semana oin bele partisipa iha ezame III periodu ninia. Husu estudantes sira tenke estuda, ho nunee bele hasoru ezame pasajen. Atu hetan valor diak husi ezame refere, depende husi estudantes sira nian esforsu rasik.
Entretantu Diretor Eskola Sekundariu Jeral nu. 4 Setembru Balide, Sergio A. da Cruz husu estudantes idak-idak atu prepara estuda, tanba iha tempu badak nia laran sira sei partisipa iha ezame terseiru periodu ninia. Bainhira estuda sira hetan valor neebe mak diak husi ezame refere.
Iha fatin seluk Diretor Eskola Hotelaria no Turizmu Bekora, Charles F. Guterres hatete, estudantes hirak nee prepara aan para bele partisipa iha ezame modular ninia, tanba estudantes husi Ensinu tekvo sira laiha ezame terseiru periodu, maibe iha deit mak ezame modular ninia.
Jornalista: Jacinta Sequeira
Editora: Domingas Gomes
