DILI, STLTIMORLESTE.com – Too agora Eskola Sekundariu Jeral (ESJ) FINANTIL seidauk iha profesores ba disiplina multimedia no desportu.
Tuir Diretor ESJ FINANTIL, Aniceto Berlelo katak, profesor neebe mak menus nee ba iha disiplina nee fleksibilidade profesor sira neebe hanorin iha materia, ezemplu iha nee ba materia multimedia, maibe durante nee la abandona estudantes sira iha sala, tanba profesores neebe hanorin disiplina matematika nee tenke ba hanorin iha multimedia, ida nee iha fleksibilidade.
“Tuir lei, profesores sira neebe mak hanorin nee tenke tuir duni idak-idak nian area espesialidade, se profesores ba area matematika nee tenke ba area matematika, tanba ida nee mak husi ministeriu rasik sempre fo hatene ba profesores sira neebe mak hanorin nee tenke tuir idak-idak nian area espesialidade,” dehan Aniceto ba jornalista STL iha nia knaar fatin Aimutin, Segunda nee (07/04/2025).
Nia dehan, ida nee laos husi Ministeriu Edukasaun mak la prepara, maibe ema mak too agora seidauk hatama ninia vaga ba iha ME para rekruta, tanba nee ba disiplina multimedia no desportu, rua nee koalia kona-ba espesialidade nee seidauk, maibe kona-ba abandona sala laiha, tanba iha profesor neebe hanorin materia seluk, maibe sira iha esperiensia bele hanorin ba disiplina rua neebe ohin mensiona seidauk iha profesor, maibe sira tenke iha esperiensia ba materia desportu no multimedia ninia, laos naran ba taka deit lae.
Iha sorin seluk, Diretor EBC 10 Dezembru Komoro, Calistro A. Guterres hatete, iha sira nian eskola profesores ba disiplina kompletu no laiha difikuldade, kada loron sira lao tuir orariu neebe mak iha.
“Iha nee ita bele hatete katak, kompletu maibe ami mos buka hela nesesidade emerjensia ida, maibe kona-ba disiplina hotu ami nian profesores kompletu no laiha difikuldade konaba ida nee,” dehan nia.
(jac)
