DILI, STLTIMORLESTE.com – Eskola hamutuk 14 iha Munisipiu Ainaro, too agora sei menus meza no kadeira ba estudante sira.
Lia hirak nee hatoo husi Diretor Servisu Edukasaun Munisipiu Ainaro, Patricio da Costa Magno ba STL liu husi telefone, Kuarta nee (12/03/2025).
“Kona-ba fasilidade ita halo ona pedidu no resposta husi ministeriu mos iha ona, nee duni ita hein deit husi Ministeriu Edukasaun lori mai, nee mak ita hein deit meza no kadeira neebe mak husi ME atu fo apoiu ba ita nian eskola sira, tanba husi ME atu haruka mai iha Munisipiu, tanba ita nian eskola hamutuk 14 mak sei menus meza no kadeira ba ita nian estudante sira, no agora husi ME atu aumeta tan deit,” nia dehan.
Nia dehan, eskola neebe sei menus meza no kadeira nee hahu husi nível pre eskolar too iha nível ensinu baziku, lista husi ministeriu haruka ona ba sira, tanba nee hein deit husi ME haruka fasilidade sira nee ba iha munisipiu.
Nunee mos Diretor Servisu Edukasaun Munisipiu Liquica, Julio da Silva hatete, eskola iha Likisa balu sei falta meza no kadeira ba estudante sira, oinsa mak ministeriu bele aumenta fasilidade ba eskola neebe sei menus.
“Ita nian eskola balu iha Likisa sei menus meza no kadeira ba ita nian estudante sira, tanba nee ita hein katak, ministeriu bele aumenta fasilidade ba eskola neebe mak too agora sei falta meza no kadeira,” nia esplika.
Entretantu Diretor Diresaun Nasional Infransturtura no Edukativu iha ME, Helio Lopes hatete, kadeira no meza sufisiente ona para responde eskola sira neebe laiha kadeira no meza imklui sala de aula foun sira neebe konstrui, laiha kadeira no meza, presiza atu prienxe ba sala de aula foun sira neebe konstrui, kadeira ho meza eskola barak eziste hela, falta de jestaun para kontrolu sasan sira nee.
(jac)
