DILI, STLTIMORLESTE.com – Estudantes husi eskola 15 iha Munisipiu Ainaro hahu uza ona farda, no balun sei iha prosesu nia laran.
Patricio da Costa Magno hanesan Diretor Servisu Edukasaun Munisipiu Ainaro hatoo asuntu nee ba STL liu husi telefone, Sesta nee (11/07/2025).
“Ami iha Munisipiu Ainaro nee EBC lima mak uza ona farda, EBF sia, ensinu sekundariu ida, eskola hamutuk 15 mak uza ona farda, ami nian EBC iha Ainaro nee hamutuk 93, ita nian estudantes husi eskola sira seluk nee foin pesan farda husi kompanhia, espera katak sira mos bele uza hotu ona farda hanesan ho estudantes sira neebe mak agora daudaun uza ona farda,” nia afirma.
Patricio akresenta, estudantes husi nibel eskola neebe ohin mensiona, sira nee mak hahu uza ona farda, agora balun sei iha prosesu nia laran, foin pesan liu husi kompanhia, no bainhira farda too mai sira bele uza ona.
Iha parte seluk, Diretor Servisu Edukasaun Munisipiu Likisa, Julio da Silva hatete, estudantes husi Eskola Sekundariu Jeral Likisa no Ensinu Baziku Sentral (EBC) Daru Lete iha Munisipiu Likisa uza ona uniforme nasional.
“Kona-ba uniforme nee lao tiha ona, iha Munisipiu Likisa ita nian eskola rua mak uza ona uniforme nasional, eskola rua mak fo ona informasaun mai hau katak sira uza ona uniforme nasional, maibe seluk nee sira seidauk fo informasaun mai hau, estudantes husi Ensinu Sekundariu Jeral Likisa nian nee estudantes sira hahu uza uniforme iha fulan kotuk liu ba, EBC nee iha semana ida rua liu ba mak sira uza,” nia esplika.
Julio dehan, nee duni estudantes husi ESJ Likisa no EBC Daru Lete mak agora daudaun uza ona uniforme tuir sirkular neebe mak fo sai husi Ministériu Edukasaun (ME), balun farda oin ida no balun oin rua, depende ba sira kontaktu ho kompanhia.
“Prosesu nee eskola sira koalia ho inan aman mak aseita ho kompanhia, depois mak hatete sira organiza hodi kompanhia produs, maibe liu husi konselhu inan aman estudantes sira nian, tanba nee balun sei iha prosesu nia laran,” nia afirma.
(jac)
