DILI, STLTIMORLESTE.com – Servisu Edukasaun Munisipiu Likisa identifika eskola ensinu baziku 20 resin sei menus meza no kadeira.
Diretor Servisu Edukasaun Munisípiu Likisa, Julio da Silva dehan, fasilidade hanesan meza no kadeira too ohin loron sei menus hela.
“Ita nian fasilidade meza no kadeira too ohin loron sei menus hela, ami halo ona pedidu ba Ministeriu Edukasaun nasional, maibe too ohin loron ninia rezultadu seidauk iha. Ami nian pedidu nee hatama desde iha Julhu ou Junhu tinan ida nee, ami identifika eskola ensinu baziku 20 resin mak sei menus meza no kadeira,” dehan nia ba STL liu husi telefone, Kinta (20/11/2025).
Julio akresenta, meza no kadeira ba nibel sekundariu no tekvo nee iha ona. Dadus ida agora 20 nee nibel ensinu baziku deit mak sei menus meza no kadeira, espera iha tempu besik Ministeriu bele haree asuntu ida nee.
Iha fatin seluk, Diretor Servisu Edukasaun Munisípiu Manatuto, Patricio da Cruz Quintao dehan, iha Munisipiu Manatuto iha eskola balun sei menus meza no kadeira, tanba nee nafatin halo identifikasaun ba iha eskola neebe sei menus meza no kadeira ba estudantes sira.
Jornalista: Jacinta Sequeira
Editora: Domingas Gomes
