DILI, STLTIMORLESTE.com – Eskola husi Munisipiu Manatutu hamutuk 23 mak asesu ona programa merenda eskolar, husi numeru nee kompostu husi Pre Eskolar no Ensinu Baziku.
Lia hirak nee hatoo husi Diretor Servisu Edukasaun Munisipiu Manatutu, Patricio da Cruz Quintao ba STL liu husi telefone, Segunda nee (24/03/2025).
“Ita iha Pre Eskolar 21, maibe agora asesu ona merenda eskolar nee eskola 12, depois ida seidauk han nee 9, eskola 12 neebe asesu merenda eskolar nee nível ensinu Pre Eskolar deit, ensinu baziku iha Manatutu 18, maibe ida han ona nee 11, ida seidauk han nee 7, tanba nee eskola 23 mak estudantes sira asesu ona ba iha merenda eskolar, nee kompostu husi nível ensinu baziku no pre eskolar,” haktuir nia.
Patricio dehan, eskola neebe mak seidauk asesu merenda eskolar nee hamutuk 16, nee nível pre eskolar no ensinu baziku, agora total benefisiariu ba pre eskolar nee iha 1.137, ensinu baziku 12.230. Eskola neebe seidauk halao merenda nee, tanba grupu EJP sira nia relatoriu tinan kotuk nian nee sei konfuzaun hela.
“Iha eskola balu mak sira husi finansas manda sala tiha, foin lalais nee sira balu troka grupu nee tenke troka hotu sira nian asinatura, neebe prosesu nee foin daudaun husi banku haruka atu hetan kona-ba asinatura nee,” dehan nia.
(jac)
