DILI, STLTIMORLESTE.com – Tinan oin Eskola Sekundariu Jeral 24, profesores sira hanorin estudantes sei uza sistema eletronika iha sala de aula.
Diresaun Ensinu Sekundariu liu-liu atu sosa komputador ba sala de aula, komputador laos uza ba materia multimedia, maibe atu uza hanorin sistema eletronika, entaun nia prosesu nee katak, agora daudaun iha hela aprovizionamentu nian liman, liu husi tenderizasaun no sei uza ba iha eskola, tanba kada sala de aula nee ami sei tau projektor ida ho desktop ida, razaun tau desktop mak imi hatene katak atu fasilita manorin sira,” dehan Diretor Nasional Ensinu Sekundariu iha ME, Benjamin Gomes da Cruz Fernandes ba jornalista STL iha nia knaar fatin Vila Verde, Segunda nee (30/06/2025).
Nia dehan, maioria manorin sira iha Timor iha laptop bazeia ba sira nian esprienseia haree katak, uza desktop nee para manorin sira bele prepara materia iha desktop nee atu uza hanorin estudantes sira, no bele muda ona sistema manual nee ba eletronika, durante nee manorin sira hanorin uza hela zis.
“Diresaun Sekundáriu Jeral katak, iha tinan oin mai eskola neebe mak ami identifika ninia kondisaun preparasaun kompletu ona nee pur volta eskola 24, nee mak tinan oin manorin sira hanorin sei uza sistema eletroniku, la uza ona zis, husi ida nee ninia sala de aula trezentus resin, nee sei tau komputador iha nee ba,” nia esplika.
Nia hatutan, husi diresaun ida nee nafatin halo koordenasaun ho parte aprovizionamentu, ho nunee bele aselera, tinan oin bele implementa sistema eletroniku nee ba eskola neebe mak ohin mensiona.
(jac)
