DILI, STLTIMORLESTE.com – Eskola Ensinu Baziku Sentral (EBC – sigla português) 26 iha area Munisipiu Ainaro sei menus sala de aula ba estudantes sira.
Haktuir Diretor Servisu Edukasaun Munisipiu Ainaro, Patricio da Costa Magno ba jornalista STL liu husi telefone, Kinta nee (12/06/2025).
“Difikuldade neebe mak ita nian eskola sira hasoru nee mak kona-ba sala de aula mak menus, kona-ba meza no kadeira ita nian estadu rezolve ona oituan. Eskola 14 mak tama iha ita nian planu, maibe nee depende fali ba iha orsamentu. Agora ita nian eskola neebe mak ita presiza aumenta sala nee hamutuk 26, nee ensinu baziku,” tenik nia.
Nia afirma, haruka tekniku sira ba sukat hotu ona, maibe nee depende fali ba iha orsamentu neebe iha, tanba numeru eskola neebe mak ohin temi ona nee presiza aumenta tan sala de aula ba estudantes sira.
Nunee mos Diretor EBC Fatumeta, Cornelio S. dos Santos dehan, sala neebe mak plafon aat, ninia janela aat no buat seluk neebe mak ohin mensiona nee ladun seguru ba estudantes sira, liu-liu iha tempu udan no anin boot, maibe sira nafatin uza konsiensia para nunee prosesu aprendizajen lao diak hanesan baibain.
“Sala sira nee tuir lo-loos ita la merese atu uza ona, tanba iha risku boot ba ita bainhira tempu udan no anin boot, nee fo risku ba profesores no estudantes sira, nee duni ita nian kondisaun mak hanesan nee, ami mos hatoo ami nian konstrusaun neebe mak agora aat, ami hatoo ona ami nian karta ba Ministeriu Edukasaun, parte infransturtura nian, espera katak sira bele tun mai haree ami nian kondisaun sala neebe daudaun nee sei aat hela,” dehan nia.
Iha fatin seluk, Diretor Diresaun Nasional Infransturtura no Edukativu iha ME, Helio Lopes antes nee hatete, iha orsamentu konsentra ba iha sala de aulas, pur volta US$ 1000 resin, sala de aulas neebe mak too agora iha kondisaun aat, presiza konsentra orsamentu ba rezolve kondisaun sala de aulas, tanba sala de aulas mak habesan fasilidade importante tebes-tebes hodi bele apoiu ensinu aprendizajen direitamente iha kada eskola.
“Ita hotu konsiente katak, maioria eskola sira iha teritoriu nasional nee laiha moru protesaun, maibe ministeriu iha dadus no ministeriu nafatin tau mos prioridade entre prioridade sira seluk, prioridade tebes-tebes mai Ministeriu Edukasaun atu haree ba infraestrutura, liga ba fasilidade sira neebe mak tuan ona, presiza urjentimente hodi ita halo konstrusaun ka reabilitasaun, liu-liu sala de aulas, biblioteka, sala ba profesores. Entaun moru ita halo, ita konstrui no reabilita, maibe la ba eskola hotu-hotu, eskola ida rua neebe iha nesesidade urjenti para halo moru protesaun,” nia afirma.
(jac)
