DILI, STLTIMORLESTE.com – Semana oin Eskola Sekundariu Téknika Vokasional ba Indústria no Teknolojia (ESTV-IT) 28 Novembru Bekora, hahu simu estudantes hamutuk 325.
Diretor Eskola Sekundáriu Téknika Vokasional ba Indústria no Teknólojia (ESTV-IT) 28 Novembru Bekora-Díli, Tomas Pinto dehan, agora daudaun komisaun organizadora simu estudantes foun sei lao hela, ao mezmu tempu seidauk rona rezultadu.
“Agora daudaun komisaun organizadora simu estudantes foun sei lao hela, ao mesmu tempu estudantes seidauk rona rezultadu. Entaun muda ba iha loron 22-24 de Dezembro de 2025, tuir ami nian planu ami sei simu estudantes foun hamutuk 325 pessoas. Husi numeru nee kompostu husi departamentu 4,” dehan nia ba STL, Kinta (18/12/2025).
Iha fatin seluk Diretor Eskola Sekundariu Jeral no 4 Setembru Balide, Sergio A.da Cruz dehan, sira simu estudantes foun iha Dili laran deit, estudantes neebe husi Munisipiu mak mai sira sei la simu.
“Ami simu estudantes foun sei haree ba ami nian sala ensinu aprendizajen ninia. Ita nian estudantes husi Munisípiu mai la simu, tanba bazeia ba despaisu husi ME katak, la simu estudantes mai husi Munisipiu. Tanba nee ami simu deit ita nian estudantes iha kapital Dili, husi Munisípiu mai la simu ida,”dehan nia.
Iha fatin seluk Diretor Eskola Baziku Central (EBC), Manleuana, Carlos Correia hatete, sira simu estudantes foun haree ba iha sala no fasilidade eskola nian neebe mak sira iha, tanba sira nian sala de aula balun neebe dadaun nee atu hadia, nunee sira simu estudantes foun presiza haree ba asuntu ida nee.
Nunee mos Diretor Eskola Sekundariu Jeral 10 Dezembru Komoro, Manuel Verdial hatete, estudantes neebe mak husi Munisípiu atu mai kontinua estudu iha Dili, tenke fo deklarasaun neebe lo-loos ba eskola, tanba iha Dili sala de aula limitadu.
Jornalista: Jacinta Sequeira
Editora: Domingas Gomes
