BAUKAU, STLTIMORLESTE.com – Eskola 4 iha Munisipiu Baukau la konsege realiza ezame nasional ba loron datoluk nian, tanba mosu falhansu tekniku iha materia ezame.
Tuir Diretor Servisu Edukasaun Munisipiu Baukau, Afonso dos Santos da Costa esplika, eskola 4 refere mak hanesan, Ensinu Baziku Sentral (EBC) Uailili sala 1, Soba Laga sala 1, Seiçal sala 2 no Fitun Sagadate sala 1, neebe fo impaktu ba estudante nain 103 husi eskola refere la tuir ezame nasional iha loron Kuarta semana nee.
“Nee dala ruma falha tekniku iha nasional, materia nee lo-loos Siensia Naturais CFN ho tetun, maibe sira tau fali Historia ho Geografia,” hateten Afonso ba STL iha knaar fatin Tirilolo, Kinta (17/10/2024).
Nia fundamenta, sala tekniku refere husi ekipa nasional ba preparasaun ezame nasional nian neebe marka iha evolope materia leten, Siensia Naturais (CFN) no Tetun, maibe envolope laran iha fali materia Historia ho Geografia.
Nia sublina, bainhira estudante husi eskola 4 enfrenta preokupasaun refere, parte Edukasaun Munisipal relata kedas ba nasional hodi fo solusaun, tanba ezame refere mak dalan uniku atu termina estudante sira nia luta tinan 3 iha banku eskola EBC.
“Nee la fo impaktu, tanba edukasaun fo ona informasaun atu sira tau orariu tuir iha segundu emisaun tuir mai,” Afonso akresenta.
Dirijente Edukasaun Baukau nee informa, ezame ba segundu emisaun nian iha Baukau sei realiza iha loron 22 Outubru semana oin, neebe atu fasilita fali estudante husi eskola 4 refere, inklui mos estudante aujente nain 4 neebe la konsege tuir ezame iha loron dahuluk nian, tanba moras no preokupasaun seluk.
(EST 2)
