DILI, STLTIMORLESTE.com – Liu husi monitorizasaun neebe inspetores sira halao iha eskola sira Munisipiu Dili, dadus provizoriu eskola lima (5) sei menus meza no kadeira ba estudantes sira.
Haktuir Cesarina Correia Guterres, nuudar Superintendente Edukasaun Munisipiu Dili afirma, dadus provizariu daudaun nee eskola lima (5) neebe mak ohin mensiona nee mak sei menus meza no kadeira ba estudantes sira.
“Hau hanoin kona-ba eskola neebe menus meza no kadeira nee, ita nian dadus provizoriu eskola neebe mak sei menus kadeira meza mak hanesan EPE Avo Ana Irene Metinaro, EPE Benunuc Metinaro, EPE Acanunu Hera ho EBF 12 de Outubro, kadeira meza EBC Manleuana mos sei menus,” dehan Cesarina ba jornalista STL, Kinta (30/10/2025).
Nunee mos Diretor Servisu Edukasaun MunisÃpiu Likisa, Julio da Silva hatete, eskola balun iha Munisipiu Likisa sei menus meza no kadeira ba estudantes sira, nuudar Diretor Edukasaun sempre halo pedidu ba iha parte nasional, atu nunee bele fo apoiu fasilidade meza no kadeira ba eskola sira.
“Ita nian eskola balun iha Munisipiu Likisa sei menus meza no kadeira ba estudantes sira, nuudar Diretor Edukasaun sempre halo pedidu ba iha parte nasional hodi bele fo apoiu fasilidade meza no kadeira ba eskola sira,” nia informa.
Jornalista: Jacinta Sequeira
Editor: Xisto Mendonça
