DILI, STLTIMORLESTE.com – Dadus provizoriu daudaun nee eskola 8 iha Munisipiu Bobonaro seidauk iha guarda eskola.
Liafuan nee haktuir husi Diretor Servisu Edukasaun Munisípiu Bobonaro, Miguel Freitas ba jornalista STL liu husi telefone, Tersa (04/11/2025).
Nia katak, dadus provizoriu neebe agora dadaun iha nee eskola 8 mak seidauk iha guarda eskola.
“Dadus provizoriu neebe agora dadaun nee ita nian eskola 8 mak seidauk iha guarda eskola, maibe depois asesu tan dadus lolos nee eskola 20 nunee mak seidauk iha guarda eskola. Eskola 8 neebe seidauk iha guarda eskola nee iha EBC sentru no ita nian eskola filial sira,” nia dehan.
Miguel hatutan, nee duni atu kobre hotu eskola sira nee barak, maibe nia tenke konfirma fila fali dadus. Lo-loos nee liu fali 8 neebe mak ohin mensiona, tanba eskola area remotas nee barak mak laiha guarda eskola.
Iha fatin seluk Diretor Servisu Edukasaun Munisípiu Manatuto, Patricio da Cruz Quintao dehan, eskola balun iha ona guarda eskola,maibe balun laiha tanba eskola sira iha area remotas nee barak seidauk iha guarda eskola.
Nunee mos Diretor Servisu Edukasaun Munisípiu Liquica, Julio da Silva katak, los duni eskola neebe lokaliza iha Munisipiu Liquica, balun iha guarda eskola no balun too agora seidauk iha guarda.
Jornalista: Jacinta Sequeira
Editora: Domingas Gomes
