DILI, STLTIMORLESTE.com – Eskola Baziku Sentral (EBC – sigla português) Manleuana too agora seidauk selu rental nia osan neebe eskola deve hodi foto kopia materia ezame primeiru periodu ninian neebe halao tiha ona.
Diretor EBC Manleuana, Carlos Correia hatoo kestaun nee ba jornalista STL iha nia knaar fatin Manleuana, Dili, Segunda nee (28/04/2025).
“Hau hanoin kona-ba konsesoins eskolar nee too agora seidauk tama ida, tanba informasaun deit mos laiha tan, ami nian relatoriu 2024 nian hatama tiha ona, agora hela 2025 nian atu foun fali nee seidauk nafatin, rental nian deve nee seidauk selu, tanba bainhira osan sai mak ami bele foin selu rental nian osan neebe ami halo kopia materia ezame primeiru periodu nian, neebe ita halao tiha ona,” dehan nia.
Carlos dehan, konsesoins eskolar nee ate agora seidauk sai no informasaun kona-ba osan nee mos seidauk iha, tanba nee husi eskola hein deit bainhira mak osan nee sai para sira bele selu rental nia osan.
“Deve rental nee laos ita foin halo iha tinan nee, maibe kada tinan nunee hela deit, tanba bainhira osan nee tama tarde nee hakarak ka lakohi ita deve uluk lai rental sira, depois osan nee tama hafoin ita selu fali rental nia osan,” nia esplika.
(jac)
