BAUKAU, STLTIMORLESTE.com – Eskola Publiku Ensinu Baziku Filial (EBF) Alaua Kraik, iha Postu Administrativu Baguia, Munisipiu Baukau, daudaun nee iha manorin nain ida (1) hanorin estudante kobre sala haat (4).
Xefe Suku Alaua Kraik, João Baptista Antonio Alves argumenta, eskola nee rasik antes iha manorin nain 4, kompostu kontratadu nain 2, voluntariu nain 1 no permanente nain 1, maibe hafoin Ministeriu Edukasaun hapara manorin kontratadu fo impaktu ba prosesu aprendizajen iha eskola refere, tanba iha deit manorin nain 1 hodi hanorin estudante sira.
“Eskola filial iha ami nia suku ate agora manorin mak laiha, iha maibe nain 1 deit, ema ida mak akumula husi primeiru anu too kuartu anu,” dehan Xefe Suku ba jornalista STL iha Vila Antiga, Tersa (01/4/2025).
Autoridade suku nee hateten, mezmu potilika Governu liu husi Ministeriu Edukasaun halo ona rekrutmentu ba manorin nain sira, maibe too agora seidauk destaka, nunee obrigatoriu manorin nain 1 tenke hanorin estudante sira husi sala primeiru too kuarta klase, tanba laiha manorin seluk apoiu hanorin estudante sira.
Nia informa, estudante sira neebe eskola iha EBF Alaua Kraik husi Aldeia Alaua no Afagia, maibe labele ba eskola iha eskola sentral Baguia, tanba distansia dook lao kilometru haat inklui akur mota rua.
“Nee difukulta tebes estudante sira, tanba profesores ida mak hanorin husi primeiru anu too remata, maibe seidauk destaka profesores ida,” nia hateten.
Xefe Suku nee husu parte kompetente iha nasional no munisipiu atu koloka manorin nain sira ba iha Eskola Ensinu Baziku Filial Alaua Kraik, hodi hanorin estudante sira, tanba oras nee iha deit manorin nain 1 hodi responde prosesu aprendizajen ba estudante sira.
Liga asuntu nee, STL tenta konfirma Diretor Servisu Edukasaun Munisipiu Baukau, maibe seidauk bele fo komentariu, tanba sei inkomoda.
Entretantu estudante neebe daudaun halao estudu prosesu aprendizajen iha Eskola Ensinu Baziku Filial Alaua Kraik hamutuk nain 60, kompostu Primeiru too Sestu klase neebe rejistu husi Aldeia Alaua no Alaguia.
(tom)
