BAUKAU, STLTIMORLESTE.com – Edifisiu eskola primeiru segundu siklu Ensinu Baziku Filial (EBF) Suku Kaibada, Postu Administrativu Baukau Vila, Munisipiu Baukau, kondisaun aat.
Koordenador eskola EBF Kaibada Uaimua, Augosto Lopes esplika, sala aprendizajem ba estudante primeiru segundu siklu iha ensinu baziku filial Kaibada Uaimua hamutuk sala 6 neebe konstrui iha tempu Indonezia, maibe daudaun sala 3 kondisaun fo ameasa ba estudante sira, tanba ai grabat sira hahu dodok.
“Kondisaun eskola nee kleuar ona halo iha 1983 too agora seidauk reabilita ai sira lahok no tohar hotu ona, sasan sira nee mak ami preokupa,” Augosto hateten ba jornalista sira, iha EBF Kaibada Uaimua, Sesta (14/11/2025).
eskola nee tuir nia hahu infrenta kondisaun aat iha tinan hirak liu ba, maibe parte eskola hanesan profesores sira foti inisiativa troka ona ai balu no balu seidauk troka tanba laiha finanseiru.
Nunee liu husi pedidu hatoo ona ba Servisu Munisipal Edukasaun Baukau atu halo reabilitasaun ba eskola refere, maibe seidauk iha responde.
“Kondisaun eskola nee ami hatoo ona no sira mai haree ona tripel no ai sira dodok nee, nee fo impaktu ba estudante ai dodok hotu ona se bele karik troka tiha ai kalen sira neebe dodok nee,”Augosto espresa.
Koordenador eskola nee husu ba Ministeriu Edukasaun atu nafatin tau atensaun ba kondisaun infrastruktura Edukasaun nian, tanba kondisaun eskola EBF Kaibada Uaimua daudaun fo ameasa ba estudante sira iha tempu udan no anin, tanba ai grabat sira kuaze dodok kauza kalen tabele rezulta udan been tama iha sala laran.
Iha fatin hanesan estudante Cristovão Adlia Guterres Cabral sente triste, tanba kondisaun eskola EBF Kaibada Uaimua kondisaun aat iha neebe tempu udan estudante sira labele tuir prosesu aprendizajem.
“Ami sente triste tanba eskola kondisaun la diak no iha tempu udan ami labele tuir prosesu aprendizajem, tanba tauk eskola kondisaun aat husu Ministeriu Edukasaun hadia tiha ami nia eskola nee,” Estudante Cristovão rekomenda.
Entretantu total estudante iha eskola Ensinu Baziku primeiru segundu siklu Kaibada Uaimua, hamutuk 200 resin kompostu feto mane.
Jornalista: Tomas Reis
Editora: Carme Ximenes
