LAUTÉM, STLTIMORLESTE.com – Eskola Enisinu Baziku Filial (EBF) Numeru 1 iha Aldeia Somotcho presiza aumenta turma, tanba eskola nee iha aula rua (2) deit.
“Ita presiza aumenta sala se aula, tanba kondisaun turma la permite no favoravel ba estudante klase 1, 2 no 3 iha Aldeia Somotcho ho total hamutuk 100 resin, eskola tenki troka malu, balu eskola iha dader no balu iha loraik nian,” dehan Diretor Eskola EBF Aldeia Somotcho, Hermengildo da Costa ba STL, Segunda (13/01/2025).
Kondisaun eskola tuir nia, daudaun nee la seguru ba estudante sira bainhira halao atividade eskola, tanba turma mos kloot, kondisaun hanesan kalen sira mos fruzu daudaun ona, entaun kuandu uda boot bele impede estudante sira.
Turma neebe iha EBF Aldeia Somotcho rua (2) deit, kuantidade estudante 100 resin, kuandu fahe orariu ba estudante klase 1 ho 2 dader nian, klase 3 loraik, profesor mos ema nian ida deit, entaun labele perkore hotu.
Iha parte seluk, Xefe Aldeia Somotcho, Alberito Caetano hatete, kondisaun Eskola EBF numeru 1 iha Aldeia Aomotcho turma rua deit, kuantidade estudante barak, klase 1 too 3 balu eskola iha dader no balu seluk iha loraik nian, profesor mos nain ida deit, entaun atu hanorin estudante sira ho dignu nee difisil.
Eskola EBF Aldeia Somotcho nee konstrusaun refere hahu iha tinan 2010 ba leten, maibe durante nee seidauk halo reabilitasaun, kondisaun la diak, laiha merenda eskola neebe dignu, signifika atu influensia estudante menoridade sira kontinua eskola ho diak nee laiha, tanba nee husu atu kria kondisaun eskola nian ho dignu, atu garante estudante sira ba eskola.
Entretantu Profesor Reformadu, Manuel dos Santos afirma, eskola EBF Aldeia Somotcho uluk sala ida deit iha tempu Indonezia nian, maibe sala refere kondisaun la diak, nunee husi programa Planu Dezenvolvimentu Nasional Suku (PNDS) aumenta fali sala rua (2) iha tinan 2010 ba leten, too agora estudante sei uza nafatin, maibe kondisaun la diak ona.
(EST 1)
