DILI, STLTIMORLESTE.com – Eskola Sekundariu Jeral FINANTIL laiha problema livru manual ba profesores sira, tanba sira nian livru sufisiente hela.
Lia hirak nee hatoo husi Diretor Eskola Sekundariu Jeral FINANTIL, Aniceto Berlelo ba STL iha nia knaar fatin Aimutin, Dili, Kinta nee (17/10/2024).
“Ami nian profesores sira agora daudaun hanorin ita nian estudantes sira nee lori manual neebe mak tuir duni regras husi Ministeriu Edukasaun ninia, nee duni laiha problema ba ita nian livru manual sira, tanba ami iha biblioteka atu asegura ita nian livru sira nee iha ami nian eskola, nee duni iha ami nian eskola ida nee, kona-ba livru manual nee ba ami laiha problema, ita nian profesor sira hanorin lori manual neebe daudaun nee iha,” nia afirma.
Nia dehan, sira iha biblioteka para oinsa mak bele rai livru neebe iha, ho nunee bele asegura diak liu tan livru, no estudantes sira bele hakat ba biblioteka hodi lee livru sira nee, maibe lee hotu rai fila fali iha fatin.
Iha fatin seluk, Koordenadór Gabinete Unidade Kurríkulu Nasionál Ministériu Edukasaun ME, João Maupelu dehan, livru manual sira daudaun nee kontinua produs iha sentru impresaun, no balun distribui tiha ona ensinu sekundariu sira, nee duni livrus manual ba sekundariu distribui tiha ona ba eskola sira.
“Kona-ba livru manual sira nee ita produs iha sentru impresaun, depois ita halo distribuisaun ba ita nian eskola sira, nee duni ba ita nian ensinu sekundariu sira ita distribui ona livru manual ba eskola sira,” nia afirma.
Nia hatutan, distribuisaun sira nee bazeia ba pedidu neebe mak husi eskola sira ba iha Siretor Edukasaun Munisipiu sira, depois mak mai iha nasional, nee duni distribuisaun nee bazeia ba pedidu.
Nunee mos Diretor Eskola Sekundariu Nobel da Paz, Jeremias P. de Jesus dehan, sira sei menus livrus, maibe nuudar eskola privadu la ezije ba governu, depende ba governu nian apoiu, tanba realidade neebe iha sira menus livru manual.
(jac)
