DILI, STLTIMORLESTE.com – Too agora Servisu Edukasaun Munisipiu (SEM) Likisa seidauk simu pedidu kona-ba eskola neebe hetan estraga husi udan no anin boot.
Julio da Silva hanesan Diretor Servisu Edukasaun Munisipiu Likisa hatoo kestaun nee liu husi telefone, Segunda nee (10/03/2025).
“Asuntu kona-ba eskola sira estragus husi udan no anin boot, too agora hau seidauk simu pedidu ruma mai husi ita nian eskola sira neebe mak lokaliza iha Munisipiu Likisa nia laran, kuandu pedidu la mai, entaun laiha eskola ida mak estragus, tanba nee ami nian eskola sira seidauk hatoo informasaun liga ba asuntu nee seidauk,” dehan nia.
Julio hatutan, loos duni durante nee udan akompanha ho anin boot, maibe eskola iha Likisa rasik la hetan estragus, kuandu iha, entaun husi eskola sira hatoo pedidu ruma mai iha Servisu Edukasaun Munisipiu Likisa ninia.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao dehan, eskola iha Manatuto seidauk hetan estragus husi udan no anin, maibe iha EBF ida mak ameasa duni, tanba rai halai, maibe seidauk estragus, foin ameasa deit tanba udan la para, tanba nee seluk seidauk.
Nunee mos Fernando Soares hanesan Diretor Nasional Edukasaun Inkluzivu Asaun Sosial Eskolar iha Ministeriu Edukasaun hatete, Ministeriu Edukasaun liu husi Diresaun Nasional Edukasaun Inkluzivu Asaun Sosial Eskolar (DNEIASE) kontinua simu pedidu kona-ba eskola neebe hetan estragus husi servisu edukasaun munisipal.
(jac)
