DILI, STLTIMORLESTE.com – Eskola Hotelaria no Turizmu Bekora fasilita formasaun lian tolu ba estudantes sira, lian tolu nee mak hanesan português, inglês no japaun.
Charles F. Guterres hanesan Diretor Eskola Hotelaria no Turizmu Bekora hatoo kestaun nee ba jornalista STL iha nia knaar fatin Bekora, Sesta nee (04/07/2025).
“Tanba nee husi parte eskola nian, ami agora daudaun nee laos deit hanorin, maibe ami mos iha loron Sabadu nee halo atividades extra ida fo formasaun ba estudantes sira iha lian inglês, português no lian japaun, estudantes sira ita liberdade ba sira para sira bele hili lian tolu nee,” katak nia.
Nia hatutan, iha loron Sabadu nee husi eskola halao atividades extra kurikuler ida, atu nunee fo formasaun lian tolu nee ba estudantes sira, kona-ba formador nee Diretor rasik hamutuk ho ninia kolega ida mai husi Amerika, nee ba lian inglês ninia, agora ba lian português nian nee eskola koopera ho ISC.
“Formasaun ba lian Japaun nian nee ita koopera ho voluntariu husi JICA sira, total ami nian estudantes agora nee hamutuk 255, profesores hanorin 33, sala aprendizajen 12, departamentu tolu mak hanesan hotelaria, kulinaria no departamentu kustura,” nia esplika.
Nia hatutan, formasaun sira nee bele fasilita estudantes sira oinsa sira bele iha konhesimentu neebe mak diak ba lian, tanba aprende lian saida deit nee importante tebes-tebes, nee duni husi eskola hotelaria fo ona formasaun ba lian tolu neebe ohin mensiona.
Iha fatin seluk, Diretor ESJ 4 Setembru Balide, Sergio A. da Cruz dehan, eskola iha ninia atividades extra kurikuler, nee halao iha loron Sabadu estudantes sira partisipa iha atividades desportu no atividades sira seluk tan.
“Ami nian eskola iha ninia atividades extra kurikuler, nee halao iha loron Sabadu estudantes sira partisipa iha atividades desportu no atividades sira seluk tan, depois oinsa mak estudantes sira nee aprende lian, tantu lian português ka lian inglês,” nia esplika.
(jac)
