DILI, STLTIMORLESTE.com – Daudaun nee Eskola Hotelaria no Turizmu Bekora laiha profesor lian português, tanba nee ba futuru husu apoiu profesores nain 2 ba lian refere.
Diretor Eskola Hotelaria no Turizmu Bekora, Charles F. Guterres dehan, kona-ba rekursu umanu, manorin ba lian português iha eskola nee too agora laiha.
“Ami nian manorin ba lian português mak too agora laiha, durante nee ami tau duni ami nian Adjuntu mak hanorin lian português ba ita nian estudantes sira, tanba professores ba lian ida nee mak laiha. Provizoriu dadaun nee Adjuntu mak sei hanorin lian português ba estudantes sira, tuir nia konhesimentu,” dehan nia ba STL, Segunda (11/8/2025).
Nia hatete, tuir lo0loos nee tenke mai husi area português duni, maibe tanba professor laiha, entaun durante nee adjuntu mak ajuda. Alende nee hetan ajuda mos husi estudantes estajiadu husi Cristal, Undil sira mak ajuda hanorin lian português ba estudantes sira, maibe agora sira nian tempu estajiu remata ona iha loron 7 foin dadaun nee.
“Professores ba lian português nee ba oin ami presiza nain rua nunee, para bele hanorin ita nian estudantes sira. Lian seluk ba ami laiha problema, tanba nee ita hakarak ba oin nee professores lisensiatura area português duni,” nia haktuir.
Nia hatutan, Eskola Hotelaria no Turizmu iha Departamentu 4, hanesan departamentu beleza, kustura, kulinaria no departamentu hotelaria.
Agora daudaun total professores permanenti 33, no estudantes 300. Sala de aula 12 no sala pratika 4.
(jac)
