DILI, STLTIMORLESTE.com – Adjuntu Diretor Eskola Hotelaria no Turizmu Bekora, Charles F. Guterres hatete, tinan ida ona eskola Hotelaria no Turizmu Bekora seidauk iha Gabinete Apoiu Tekniku (GAT), hodi apoiu servisu iha eskola nee.
“Difikuldade neebe agora daudaun ami enfrenta mak Eskola Hotelaria no Turizmu seidauk iha ninia GAT, ida nee mak ami nian difikuldade, GAT nian kompetensia tolu mak hanesan jestaun administrasaun eskolar nian, toma konta ba biblioteka, toma konta mos kona-ba subsidiu husi Governu nian. Hakerek proposal ba parte infraestrutura, nee GAT nian servisu, nee duni GAT nian servisu nee barak tebes-tebes,” dehan Charlesba ba jornalista sira STL, Tersa nee (22/04/2025).
Nia dehan, problema GAT ninia, tuir lo-loos nee pakote ida, tanba tinan hira liu ba hodi hein, kuaze atu tama tinan ida ona, servisu laiha GAT, nee servisu hotu adjuntu mak halo hotu, tanba nee servisu nee adjuntu mak toma Konta hotu ba iha asuntu ida servisu GAT nian, tanba eskola laiha GAT.
Iha fatin seluk, Diretor EBC Manleuana, Carlos Correia dehan, EBC iha Manleuana nee iha GAT, tanba GAT nian servisu nee iha administrasaun eskolar, nunee mos halo kontrolu ba iha implementasaun programa merenda eskolar.
“Ami nian GAT iha, tanba GAT nian servisu mak iha administrasaun, kontrola konsesoins eskolar, nomos halo kontrolu ba iha programa merenda eskolar, neebe mak lao iha ami nian eskola,” nia esplika.
Carlos akresenta, servisu GAT nian mak ohin mensiona nee, tanba nee sira idak-idak hatene ona sira nian servisu loron-loron nian, nee duni dezde uluk too agora iha EBC Manleuana GAT iha kedas too agora.
(jac)
