DILI, STLTIMORLESTE.com – Oras nee daudaun eskola Hotelaria no Turizmu Bekora laiha problema ba livru manual, no livru sufsiente hela.
Lia hirak nee hatoo husi Adjuntu Diretor Eskola Hotelaria no Turizmu, Charles F. Guterres ba STL iha nia knaar fatin Bekora, Kuarta nee (26/03/2025).
“Ami nian livru manual sira nee sufisiente hela ba ami no laiha problema, no ami nian livru sira nee tau iha fatin neebe mak ami prepara ona, nunee ami nian estudantes sira bele asesu ba livru sira nee, tanba livru sira nee importante mai ita para bele fasilita diak liu tan ita nian manorin sira,” nia dehan.
Nia hatutan, iha Eskola Hotelaria no Turizmu Bekora laiha problema ba livru, tanba ho livru neebe mak iha bele fasilita diak liu tan profesores no estudantes sira iha prosesu ensinu aprendizajen ninia.
Iha fatin seluk, Koordenador Gabinete Unidade Kurrikulu Nasional iha Ministeriu Edukasaun, João Mau Pelu hatete, unidade kurrikulu nasional iha ME kontinua produs livru manual ba disiplina hotu, ninia kuantidade depende ba numeru estudantes sira.
“Livru agora ita produs ona kuaze disiplina hotu, kona-ba sekundariu ita la ba kontratu iha liur, tanba iha sentru impresaun, agora ita hein distribui ba ita nian eskola sira, ita halo impakotementu hotu ona, agora ami halo planu ba iha distribuisaun, tanba ita nian distribuisaun nee tinan ida dala rua, inisiu do ano no fim do ano,” tenik nia.
Iha parte seluk, Diretor Eskola Sekundariu Jeral nu. 4 Setembru Balide, Sergio A. da Cruz hatete, sira menus livru manual ba disiplina lima, tanba nee husu ba ME atu bele fo apoiu livru manual neebe mak sira seidauk iha.
“Ami nian livru manual ba disiplina lima hanesan nee mak sei menus, tanba nee ami hanesan eskola publiku husu nafatin apoiu ba ME,” katak nia.
Nunee mos Diretor Eskola Sekundariu Nobel da Paz, Jeremias P. de Jesus dehan, sira menus livru manual, maibe sira nian eskola privadu la ezije governu, depende ba governu atu fo apoiu fasilidade ba sira.
(jac)
