DILI, STLTIMORLESTE.com – Eskola Hotelaria no Turizmu Bekora laiha problema kona-ba meza no kadeira, tanba daudaun fasilidade refere sufisiente hela ba estudantes sira.
Asuntu nee hatoo husi Diretor Eskola Hotelaria no Turizmu Bekora, Charles F. Guterres ba jornalista STL iha nia knaar fatin Bekora, Tersa nee (27/05/2025).
“Kona-ba meza no kadeira ba ami laiha problema, tanba estudantes sira tuir ensinu aprendizajen uza meza no kadeira neebe daudaun nee ami iha hela, sufisiente ba ami nian estudantes sira, nee duni ami laiha problema konaba meza no kadeira, maibe ami nian difikuldade mak too agora ami nian surat tahan sira atu print no tinta printer sira nee too agora kuaze atu hotu ona nomos destop ami nian mos kondisaun ladun diak,” tenik nia.
Iha parte seluk, Diretor Eskola Sekundariu nu. 4 de Setembru Balide, Sergio A. da Cruz dehan, meza no kadeira sufisiente hela ba estudantes sira hodi uza tuir prosesu aprendizajen iha aula, tanba nee laiha difikuldade ba meza no kadeira.
“Hau hanoin meza no kadeira sufisiente hela ba ami nian estudantes sira hodi uza tuir prosesu aprendizajen iha aula, tanba nee laiha difikuldade ba meza no kadeira, tanba nee ami nian meza no kadeira sufisiente hela ba ami nian estudantes,” dehan nia.
Entretantu Diretor EBC Manleuana, Carlos Correia hatate, sira hetan apoiu husi ministeriu, tanba nee laiha problema kona-ba meza no kadeira, tanba estudantes sira hotu tur iha kadeira hodi partisipa iha aprendizajen husi profesor sira.
“Ami hetan apoiu husi ministeriu, tanba nee laiha problema kona-ba meza no kadeira, tanba estudantes sira hotu tur iha kadeira hodi partisipa iha aprendizajen, nee duni ami laiha problema kona-ba meza no kadeira,” dehan nia.
(jac)
