DILI, STLTIMORLESTE.com – Eskola Hotelaria no Turizmu Bekora menus ekipamentu pratika, no kondisaun fatin pratika la favorese, nunee difikulta estudante sira atu aprende.
“Kona-ba fasilidade komputador nian ami seidauk hetan apoiu ida, difikuldade kona-ba estudantes sira ninia pratika nee, tanba ita halo pratika nee kuandu numeru estudantes nee boot, nee estudantes sira nee presiza atu tau iha grupu, depois grupa uluk tiha, hotu grupu ida seluk tama pratika fali, neebe sira halo pratika troka malu deit, kuandu ba hamutuk hotu nee labele, tanba fasilidade seidauk sufisiente,” dehan Adjuntu Diretor Eskola Hotelaria no Turizmu Bekora, Charles F. Guterres ba STL, Kinta nee (27/02/2025).
Nia dehan, fasilidade hanesan kustura, se estudante 30, ninia makina suku nee agora daudaun sia deit, nee presiza halo ba grupu, tanba estudante 30 ba hotu, nee labele, tanba makina iha sia deit, estudantes labele tama hotu ba iha sala pratika ninia, nee sira tenke halo fazeadamente.
“Departamentu kustura ninia nee ami iha deit makina suku ropa nee sia deit, nee mos makina ida uluk manual nee, makina modelu nee foin iha rua deit, ba departamentu kulinaria nee too agora seidauk iha sala pratika propriu, maibe uza deit ninia kitchen nee mak uza ba halo pratika,” tenik nia.
Nia hatutan, departamentu ida seluk kona-ba hotelaria nee mos agora daudaun sira halo pratika iha sala kiik ida, tuir lo-loos departamentu hotelaria nee tenke iha ninia mini hotel ida, atu nunee estudante sira bele halo pratika, maibe tanba infelizmente agora daudaun sira uza sala kiik ida halo pratika.
Nunee mos Diretor Nasional Ensinu Sekundariu iha ME, Benjamin Gomes da Cruz Fernandes hatete, kona-ba fasilidade pratika iha ensinu tekniku vokasional ninia, iha planu atu sosa komputador ba tekvo sira, iha eskola tekvo balu sei menus ekipamentus pratika nian ba estudantes sira.
(jac)
