DILI, STLTIMORLESTE.com – Eskola Tekniku Vokasional balun simu ona komputador, maibe Eskola Hotelaria no Turizmu Bekora too agora seidauk hetan apoiu husi Ministeriu Edukasaun (ME).
Liafaun nee haktuir husi Diretor Eskola Hotelaria no Turizmu Bekora, Charles F. Guterres ba jornalista STL iha niaknaarfatinBekora, Kinta (21/08/2025).
“Ami seidauk hetan komputador husi Ministériu Edukasaun, maske ita nian eskola Tekniku Vokasional balun hetan apoiu ona husi Ministeriu, maibe ami nian Eskola Hotelaria no Turizmu nee mak too agora seidauk hetan apoiu komputador husi ME, tanba ami nian estudantes sira mos presiza atu halao pratika, nee ekipamentus tenke iha para bele fasilita estudantes sira,” dehan nia.
Nia hatete, Eskola Hotelaria no Turizmu nee iha departamentu 4 mak hanesan departamentu beleza, kustura, kulinaria no departamentu hotelaria, no sira nian eskola seidauk hetan apoiu komputador husi ME.
“Komputador neebe ami nian estudantes sira atu halao pratika nee ami presiza tan 15 too 20, para estudantes sira halo pratika. Depois mai fali iha sala administrasaun nee tenke rua,” katak nia.
Iha parte seluk, Diretor Servisu Edukasaun Munisipiu Likisa, Julio da Silva dehan, eskola sira iha komputador para estudantes sira uza ba halo pratika, maibe sira halo orariu deit, para halo pratika nee troka malu.
(jac)
