DILI, STLTIMORLESTE.com – Ensinu Baziku Sentral (EBC – sigla português) Manleuana husu ba estudante sira atu tau lixu iha fatin, nunee eskola iha ambiente neebe moos.
Dehan Diretor EBC Manleuana, Carlos Correia ba STL iha nia knaar fatin Manleuana, Kuarta nee (19/03/2025).
“Agora tempu udan, ita hakarak ambiente iha eskola tenke moos no ami sempre husu ami nia estudante sira tenke hatene tau lixu iha fatin, labele soe lixu arbiru iha areador eskola nian inklui iha sala aprendizajen, ita hakarak tau lixu iha fatin para evita mos susuk iha tempu udan, maske foin daudaun husi saude lori aimoruk mai rego ona,” dehan nia.
Carlos akresenta, apela nafatin ba estudante sira labele soe lixu arbiru, kuandu han buat ruma karik tau kedas iha fatin, tanba agora tempu udan, oinsa mak evita susuk iha tempu udan, hamoos sala aprendizajen.
Iha parte seluk, Diretor Eskola Sekundariu Nobel da Paz, Jeremias P. de Jesus dehan, estudante sira tenke hatene tau lixu iha fatin neebe mak prepara ona, tanba sira nee boot hotu ona oinsa hatene tau lixu iha fatin.
“Ami mos halo limpeza iha ami nian eskola, nunee mos husu ami nian estudante sira atu halo limpeza iha sala laran inklui iha areador eskola nian,” katak nia.
(jac)
