DILI, STLTIMORLESTE.com – Eskola Ensinu Baziku Sentral (EBC – sigla português) 50 iha Munisipiu Likisa presiza aumenta sala de aula no EBC 32 sei menus meza no kadeira.
Asuntu nee hatoo husi Diretor Servisu Edukasaun Munisipiu Likisa, Julio da Silva ba jornalista STL liu husi telefone, Tersa nee (15/04/2025).
“Ita nia eskola 32 mak sei menus meza no kadeira, nee nivel ensinu baziku hotu, nunee mos iha eskola 50 mak sala de aula nee menus, presiza aumenta sala aprendizajen ba ita nian estudantes sira, nee nível ensinu baziku hotu, ita presiza aumenta sala no meza kadeira neebe mak too agora sei menus ba ita nian estudantes sira,” nia afirma.
Julio dehan, relasiona ho fasilidade no sala aprendizajen neebe sei menus, nuudar Diretor Edukasaun Munisipal halo ona pedidu ba Ministeriu Edukasaun iha fulan Marsu tinan nee, maibe too agora meza no kadeira seidauk too mai iha eskola. Likisa iha Suku Lisadila Aiamodo. Ema seidauk eskola foin atu halo sosializasaun uluk inan aman no estudante sira.
Iha parte seluk, Diretor Servisu Edukasaun Munisipiu Ainaro, Patricio da Costa Magno hatete, eskola neebe sei menus meza no kadeira nee hahu husi nível pre eskolar too iha nível ensinu baziku, lista husi ministeriu haruka ona ba sira, tanba nee hein deit husi Ministeriu Edukasaun haruka fasilidade sira nee ba iha munisipiu.
“Kona-ba fasilidade ita halo ona pedidu no resposta husi Ministeriu mos iha ona, nee duni ita hein deit husi Ministeriu Edukasaun lori mai, nee mak ita hein deit meza no kadeira neebe mak husi ME atu fo apoiu ba ita nian eskola sira, tanba husi ME atu haruka mai iha munisipiu, tanba ita nian eskola hamutuk sanolu resin haat mak sei menus meza no kadeira ba ita nian estudante sira no agora husi ME atu aumeta tan deit,” nia komenta.
Nunee mos Diretor Diresaun Nasional Infransturtura no Edukativu iha ME, Helio Lopes antes nee hatete, kadeira no meza sufisiente ona para atu responde eskola sira neebe laiha kadeira no meza, inklui sala de aulas foun sira neebe konstrui laiha kadeira no meza, presiza atu prienxe ba sala de aulas foun sira neebe konstrui, kadeira ho meza eskola barak eziste hela,nfalta de jestaun para kontrolu sasan sira nee.
(jac)
