DILI, STLTIMORLESTE.com – Estudante sira tenke kumpri regras husi eskola nian neebe durante nee estabelese ona, dader mai eskola tuir oras no hatais farda tuir nia loron.
“Ami iha regras ba ita nian estudantes, nunee mos iha regras ba ami nian profesor sira, oinsa dader tama sedu eskola, tanba nee ami fo hanoin nafatin ba ami nian estudantes sira tenke kumpri regras neebe mak estabelese ona, dader mai sedu para tuku 8 halao aprendizajen iha aula, tanba ita nian profesor sira mai sedu,” dehan Diretor Eskola Sekundariu Nobel da Paz, Jeremias P. de Jesus ba STL, Segunda nee (31/03/2025).
Iha fatin seluk, Diretor Eskola Sekundariu Jeral nu. 4 Setembru Balide, Sergio A. da Cruz hatete, tanba eskola portaun oin nee iha hela lixu fatin iha neeba, nee husi governu mak halo, nee duni bainhira labarik sira mai tarde eskola no kontra regras la tau farda, nee haruka sira halo limpeza, depois foer nee haruka ba fakar iha lixu fatin neebe mak governu prepara tiha ona.
“Tanba eskola portaun oin nee iha hela lixu fatin iha neeba, nee husi ita nian governu mak halo, nee duni bainhira labarik sira mai tarde eskola no kontra regras la tau farda nee ami haruka sira halo limpeza, depois foer nee ami haruka ba fakar iha lixu fatin neebe mak governu prepara tiha ona. Ami haruka estudantes halo limpeza nee hanesan sansaun ida ba sira, atu nunee bele muda sira nian komportamentu ou hahalok ida kontra regras eskola ninia,” dehan Diretor ESJ nu. 4 Setembru Balide, Sergio.
Nia hatutan, regras eskola nian mak oinsa estudante sira mai eskola nee lao tuir nian oras neebe mak estabelese ona iha orariu, mai eskola uza farda tuir loron, nee duni ba sira neebe mak uza farda sala nee sansaun ba sira mak halo limpeza iha areador eskola ninia.
“Entaun ho limpeza nee hau fiar sira lakon ona sira nian direitu ba materia husi ita nian profesores sira, ho ida nee sira bele muda ona sira nian atitude neebe mak sira halo ona, kona-ba sira falta nee sira nian valor mak sei termina iha neeba, depois husi eskola bolu inan aman,” tenik nia.
(jac)
