DILI, STLTIMORLESTE.com – Uniforme eskolar nee halao ona lansamentu, tanba nee eskola idak-idak sei la halo sira nian uniforme (farda).
Kestaun nee hatoo husi Ministra Edukasaun (ME), Dulce de Jesus Soares ba jornalista sira iha sentru impresaun Komoro, Dili, Kinta (13/03/2025).
“Ita hein tan, karik semana ida nee nia laran, aban ka bainrua iha informasaun ruma ona. Uniforme eskolar bainhira lansa tiha, signifika katak eskola idak-idak, iha momentu nee ita lansa iha inisiu primeiru trimestre atu ema la suku tan farda sira neebe mak hori bainhira sira suku tiha ona, ho ida nee mak ita hasai ida nee para atu bele jere, atu nunee ba eskola idak-idak halo nia farda, nee mak objetivu,” dehan nia.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, SEM Ainaro nee hatutan, sira halao ona enkontru ho inan aman estudante sira, tanba nee agora hein deit kompanhia neebe mak atu fornese farda nee, eskola sira mos buka hela ona, depois sira sei ba koalia iha Ministeriu, maizumenus kompanhia SEM mak buka deit ka Ministeriu mak deside kompanhia ida neebe.
“Husi Munisipiu Ainaro nee, eskola sira enkontru ho inan aman ona, depois inan aman hein fali informasaun, ami sei buka kompanhia ida neebe mak prepara atu suku farda nee ho kedas ninia logo, ida nee mak ami hein hela kompanhia ida neebe mak atu kaer, tanba nee tenke liu husi kompanhia, se inan aman buka deit balu iha no balu laiha, tanba ita hakarak uniforme nee hanesan,” nia afirma.
Nunee mos Diretor Servisu Edukasaun Munisipiu Likisa, Julio da Silva dehan, SEM Likisa koalia ona ho eskola sira, kompanhia no inan aman sira, maibe hena ba kor farda nee mak sei ulun moras oituan, nee duni sira seidauk tur hamutuk katak, pelumenus kor ida neebe mak bele, liu-liu ba nivel tolu Pre Eskolar, Ensinu Baziku no Sekundariu.
“Ita bele koalia, maibe buat ida ami seidauk hetan serteza ida, tanba hena nee tau duni kor, ezemplu kor matak, malahuk, ami koalia no eskola sira koalia ho kompanhia balu sira bolu, maibe sira dehan nunee, hena nee fo los ida karik diak, malahuk nee barak los, tanba nee mak ami seidauk halo uniforme nee,” nia esplika.
(jac)
