DILI, STLTIMORLESTE.com – Eskola sira laiha kobransa ou la ezije estudantes sira atu selu, tanba nee parte husi inspetor eskolar sira atua ona situasaun iha Ensinu Baziku Central (EBC) Hauba, Munisípiu Bobonaro.
Ministra Edukasaun (ME), Dulce de Jesus Soares dehan, eskola sira nee laiha kobransa ou la ezije estudantes atu selu buat ruma.
“Hau hanoin media sira hatene ona katak, ba edukasaun ensinu baziku, pre eskolar, liu-liu sira neebe mak integra iha redi publika. Eskola sira nee laiha kobransa ou la ezije estudantes atu selu buat ruma, se karik akontese hanesan nee parte inspesaun ME, tanba iha neeba inspektor eskolar sira atua ona situasaun nee. Ita boot sira hatene katak, iha neebe deit sempre iha regras ba profesor ida iha kode konduta profesores hanesan funsionariu públiku aplika regras neebe mak aplikavel iha KFP,” afirma Ministra Edukasaun (ME), Dulce de Jesus Soares ba jornalista iha sentru impresaun Komoro, Sesta (17/10/2025).
Governante nee dehan, konaba preokupasaun Eskola Filial Ailafa, Munisipiu Lautem, problema ida mos iha fatin nee ba,tanba fatin nee rai halai lori tempu oituan, tanba presiza komunidade atu bele voluntariumente fo sira nian rai atu bele halo eskola, tanba rai estudu iha nee ba laiha. Ho nunee labele halo konstruksaun tanba seidauk iha rai,maibe eskola refere tama LISTA halo konstruksaun iha tinan 2026.
“Hau hanoin liafuan bibi luhan nee tanba kondisaun eskola nee, ami mos esplika ona katak, eskola nee liu husi apoiu JICA halo tiha ona iha tinan hirak liu ba, tanba iha dezastre naturais ida neebe mak eskola nee estragus hotu kedas, maibe ME liu husi diresaun nasional asaun eskolar fo ona material emerjensia hanesan ai, hodi halo ninia kakuluk, maibe infelizmente, lori ai nee mak didin eskola nee, ida nee mak ME toma tama ona iha planu konstruksaun ba tinan 2026,” katak nia.
Jornalista: Jacinta Sequeira
Editora: Domingas Gomes
