DILI, STLTIMORLESTE.com – Ekipa Jestor Programa (EJP) mak jere programa merenda eskolar, maibe husi parte eskola nafatin halo monitorizasaun ba programa refere.
Haktuir Diretor Ensinu Baziku Sentral (EBC) 10 Dezembru Komoro, Calistro A. Guterres ba jornalista STL, Tersa nee (17/06/2025).
“Kona-ba implementasaun programa merenda eskolar hahu husi loron Segunda too Sesta lao hanesan baibain, maibe ezekusaun nee iha EJP, tanba EJP sira mak kaer osan no sira mak ezekuta programa ida nee, maibe husi parte eskola nian sempre halo monitorizasaun ba iha implementasaun programa merenda eskolar husi ita nian EJP sira. Iha ami nian monitorizasaun EJP sira implementa tuir menu neebe mak iha ona, nee establese husi Ministeriu Edukasaun no Ministeriu Saude,” dehan nia.
Calistro dehan, EJP sira ezekuta tuir menu iha manual neebe mak iha ona, tanba nee lao diak hanesan baibain, ikan ho sosis la tama iha menu, ayam potong iha, maibe Sesta nee estudantes sira han fore mungu ho susu been.
(jac)
