DILI, STLTIMORLESTE.com – Eskola Sekundariu Nobel da Paz, prepara ona karta pedidu ba Ministeriu Edukasaun (ME), liu husi Edukasaun Munisipiu Dili, atu fo apoiu livru ba eskola refere.
Tuir Fundador Eskola Nobel da Paz, atual Direitur Eskola Sekundariu Nobel, Jeremias P.de Jesus dehan, agora dadaun livru iha eskola nee sei menus, tanba nee mak halo karta pedidu ba ME.
“Agora dadaun ami nian prosesu ensinu aprendizajen lao hanesan bai-bain hahu horseik no ohin. Konaba ami nian livru menus nee, agora dadaun ami halo karta ba Edukasaun Munisipiu Dili, atu nunee sira bele fo apoiu livru mai ami. Foin dadaun Inspetor mai iha nee, husu ami atu halo karta ba ME, para bele fo apoiu livru mai ami, iha ami nian karta nee ami husu kompletu kedas,” dehan nia ba STL, Tersa (29/04/2025).
Nia katak, livru konaba ba sosiais sira nee, agora dadaun prepara ona biblioteka fatin iha ona, oinsa mak rai livru sira nee iha fatin neebe prepara ona. Hanesan livru manual sira nee, estudantes sira bele asesu iha biblioteka, tanba nee karta husu apoiu livru ba ME nee agora prepara ona.
Iha fatin seluk Direitur Nasional Ensinu Sekundariu iha ME, Benjamin Gomes da Cruz Fernandes dehan, ba eskola sekundariu neebe menus livru, sira bele halo pedidu mai Ministeriu, para nunee husi diresaun kurrikulu nian bele fo apoiu livru.
(jac)
