DILI, STLTIMORLESTE.com – Eskola Sekundariu Nobel da Paz menus livru manual ba profesores sira hodi hanorin estudante, tanba nee husu ba Ministeriu Edukasaun atu tau atensaun.
Lia hirak nee hatoo husi Diretor Eskola Sekundariu Nobel da Paz, Jeremias P. de Jesus ba STL iha nia knaar fatin, Sesta nee (08/11/2024).
“Difikuldade neebe mak ami hasoru mak kona-ba livru manual ba ita nian profesores sira, maski livru nee iha maibe seidauk sufisiente ba ita nian profesores sira, kuandu ita iha livru manual, bele fasilita ita nian profesores sira iha ensinu prosesu aprendizajen ba ita nian estudantes sira,” nia dehan.
Jeremias dehan, eskola nobel hanesan eskola privadu ida, maibe la ezije ba governu, no oinsa mak governu liu husi ME bele apoiu livru manual sira nee ba profesores sira, tanba profesores sira nee presiza iha livru manual ida ba sira, atu nunee bele ajuda sira ba prosesu ensinu aprendizajen.
“Livru manual nee importante tebes, maibe ami nian eskola privadu nee ami lakohi ezije demais ita nian governu, depende sira mak hanoin ami deit, maibe atu koalia los deit katak, ami sei menus livru manual ba ita nian estudante sira,” nia afirma.
(jac)
