DILI, STLTIMORLESTE.com – Eskola Sekundariu halo ona koreksaun ba pontus ezame pasajen neebe estudantes sira halao tiha ona.
Pasa ou la pasa nee depende ba esforsu estudantes idak-idak nian.
Lia hirak nee hatoo husi Diretor Eskola Sekundariu Nobel da Paz, Jeremias P. de Jesus ba STL iha nia knaar fatin, Segunda nee (25/11/2024).
“Kona-ba pontus ezame pasajen klase ninia, agora daudaun entrega hotu ona ba iha profesores sira, no balun kurizi hotu ona, too data mak foin bele hatama. Neebe prosesu koreksaun ba materia ezame pasajen klase nee lao daudaun ona, too loron 11 ou 12 Dezembru mak ami sei diskuti kona-ba sira nian rezultadu,” nia tenik.
Tuir Jeremias, total estudantes ensinu sekundariu neebe partisipa iha ezame pasajen hamutuk 600 resin, atu pasa ou la pasa iha ezame nee, se mak ezame kompletu, hanesan regras iha ezame pasajen ninia nee dadus iha hotu, nee duni se mak dezde iha inisiu iha valor diak no se mak valor la diak.
“Nee duni ita nian estudantes neebe mak la kompletu iha ezame, ita bele bolu sira nian inan aman para bele mai partisipa iha ezame, hanesan mos ezame nasional,” dehan nia.
Nia hatutan, hirak neebe la konsege partisipa bele tuir fali susulan.
Iha fatin seluk, Diretor Eskola Sekundariu Jeral Finantil, Aniceto Berlelo hatete, koreksaun ba materia ezame pasajen ninia lao dezde ezame remata iha loron Sabadu nee, no sei remata iha loron 28 fulan nee.
Nia dehan, profesor sira halo koreksaun ba materia nee idak-idak lori ba sira nian uma. Agora daudaun koreksaun sei lao hela too data neebe mensiona.
(jac)
