DILI, STLTIMORLESTE.com – Eskola Sekundáriu Nobel da Paz too agora seidauk iha moru protesaun, tanba sei halo uluk konstrusaun sala de aula ba estudantes sira.
“Los duni katak too ohin loron ami seidauk iha moru neebe mak atu asegura ami nian estudantes sira, tanba durante nee ami halo uluk mak konstrusaun sala de aula ba ami nian estudantes sira, neebe dadaun nee ninia edifisiu konstrusaun eskola Nobel nian andar rua ona, maske ida seluk seidauk remata los,” dehan Diretor Eskola Sekundariu Nobel da Paz, Jeremias P. de Jesus ba jornalista STL iha nia knaar fatin, Kuarta nee (11/03/2026).
Jeremias hatutan, espera katak bainhira konstrusaun sala de aula nee remata los, nee sira sei haree fali moru ninia, oinsa mak eskola nee bele halo moru, tanba eskola refere besik los ho komunidade sira nian uma.
“Eskola nee ita presiza halo duni moru para ita bele asegura ita nian estudantes sira, se lae estudantes sira tuir aula sira nian hakarak deit, tanba ita laiha moru nee, oinsa mak atu halo kontrolu masimu ba ita nian estudantes sira,” dehan nia.
Nunee mos Josefina de Jesus hanesan estudantes hatete, sira nian eskola laiha moru, nunee estudantes balun tama aula tuir sira nian hakarak deit, tanba moru laiha, bainhira lao sai ba estrada boot, balun fila ona ba uma.
“Ami nian eskola laiha moru, nunee estudantes balun tama aula tuir sira nian hakarak, tanba moru laiha, bainhira lao sai ba estrada boot, balun fila ona ba uma,” nia haktuir.
(jac)
