DILI, STLTIMORLESTE.com – Eskola Sekundáriu Jeral 10 Dezembru Komoro, prepara ona relatóriu konsesaun eskolar faze primeiru no segundu, hodi bele submete ba iha Ministériu Edukasaun (ME).
“Hau hanoin kona-ba relatóriu konsesaun nee ami prepara hotu ona, hein dia 5 de Dezembru tinan nee ami submete ona ami nian relatóriu konsesaun eskolar nee ba iha Ministériu, no ami nian konsesaun nee ami ezekuta tuir nesesidade eskola nian,” dehan Diretor Eskola Sekundariu Jeral 10 Dezembru Komoro, Manuel Verdial ba STL, Segunda (01/12/2025).
Manuel dehan, hanesan dehan ona katak, sira prepara ona relatóriu konsesaun eskola. Nee relatóriu ba fulan nen ninia, nomos relatóriu konsesaun segundu ba fulan nen nian, nee sira sei hatama iha loron 5 fulan Dezembru.
Iha fatin la hanesan Diretor Nasional Ensinu Sekundariu iha ME, Benjamin Gomes da Cruz Fernandes hatete, nee duni husu eskola sira too fim Dezembru nee tenke hatama relatóriu mai iha Ministériu. Bainhira eskola sira la hatama relatóriu maka sei afeita ba sira nian konsesaun iha faze tuir mai.
Iha parte seluk, Diretor ESJ nu. 4 Setembru Balide, Sergio A. da Cruz haktuir, depende ba Ministeriu Edukasaun husu, sira bele submete ona sira nian relatóriu ida nee, tanba ninia ezekusaun ba osan ida nee, ezekuta tuir nesesidade eskola nian presiza.
Jornalista: Jacinta Sequeira
Editora: Domingas Gomes
