BAUKAU, STLTIMORLESTE.com – Eskola Santo António Hae-Coni, iha Postu Administrativu Baguia, Munisipiu Baukau, la implementa programa merenda eskolar iha faze primeiru anu letivu 2025.
Koordenador Eskola EBF Santo António Hae-Coni, Cosme Perreira relata, implementasaun programa merenda eskolar ba anu letivu 2025 nian, neebe faze primeiru hahu husi loron 03 Fevereiru too loron 25 Marsu 2025, estudante sira iha Pre-Eskolar no Ensinu Baziku Filial Santo António Hae-Coni seidauk implementa, tanba laiha kozinheira hodi tein ba estudante sira.
“Loos ami la implementa, tanba kozinheira mak ami buka la hetan neebe osan nee iha deit sentral karik ba fali ona kofre estadu,” informa Cosme Perreira ba jornalista STL liu husi telefone, Sesta (02/05/2025).
Nia sublina, hafoin lansa programa merenda eskolar faze primeiru nian atu hahu, parte eskola hamutuk ho Ekipa Jestaun Programa (EJP) halo kedas koordenasaun ho komunidade sira, liu-liu estudante nia inan aman atu tein, maibe la koopera, tanba ho razaun insentivu kiik no iha tendensia.
Nia fundamenta, estudante neebe atu asesu ba merenda eskolar anu letivu 2025 iha Eskola Santo António Hae-Coni kompostu Pre-Eskolar no Ensinu Baziku hamutuk 94 no tuir regras kada estudante loron ida hetan 45 sentavus, maibe la konsege hetan iha faze primeiru, mezmu inisiu parte eskola no EJP halo ona koordenasaun ho estudante nia inan aman.
“Estudante nia inan aman lakohi nee ho razaun vensimentu ba sira nee mak kiik liu, tanba iha 2023 ba kotuk nee selu direita husi edukasaun fulan ida US$ 50.00, maibe agora nee mata dalan mai nee edukasaun la selu ona, maibe osan loron ida nian nee mak balun hola sasan balun ba sira, nee mak inan aman sira lakohi, tanba ema bele dehan naok teen,” haktuir Cosme Perreira.
Koordenador eskola nee deklara, razaun inan aman lakohi tein ba estudante sira, tanba hakarak evita deskonfia malu, maibe diak liu mak Ministeriu Edukasaun kontratu direita kozinha sira fulan ida ho insentivu US$ 50.00 tuir mata dalan merenda eskolar anu letivu 2023.
Xefe Departamentu Parke Eskolar iha Servisu Edukasaun Munisipiu Baukau, Sabino Arlindo Ximenes rekonhese, Eskola Santo António Hae-Coni la implementa programa merenda eskolar iha faze primeiru ho loron efetivu 35, tanba laiha kozinheira, maibe Servisu Edukasaun Munisipal liu husi Departamentu Parke Eskolar fo hanoin ona ba koordenador eskola atu buka meius hodi implementa iha faze segundu periodu nian.
“Alternativu ida ita halo mak fo nafatin inisiativa ba ita nia komunidade sira tein ba ita nia oan sira, nee mak uniku solusaun, ami esforsu ona fo orientasaun ba Koordenador hakarak ga lakohi segundu periodu tenke tein,” hateten Sabino Arlindo Ximenes.
Maibe Xefe Departamentu Parke Eskolar nee katak, edukasaun mak atu kontratu propriu kozinha hodi tein ba estudante sira nee laiha, tanba EJP mak jere orsamentu merenda eskolar no iha kompentensia foti medida fo solusaun liu husi halo koordenasaun ho estudante sira inan aman hodi tein ba estudante sira.
Entretantu estudante iha Eskola Santo António Hae-Coni la asesu merenda eskolar loron efetivu 35, ho valor orsamentu neebe alokadu fila ba kofre estadu liu US$ 1,500.00.
(tom)
