DILI, STLTIMORLESTE.com – Eskola Hotelaria no Turizmu Belora seidauk kria komisaun organizadora ba iha ezame nasional, neebe sei halao iha fulan Outobru tinan nee.
Diretor Eskola Hotelaria no Turizmu Bekora, Charles F. Guterres dehan, kona-ba ezame nasional nian, too agora seidauk forma komisaun organizadora.
“Agora daudaun ami nian estudantes klase 3 sira nee ezame ida ema bolu dehan ezame nasional pratika, nee agora sira halo hela. Parese dia 4 Setembru mak finaliza, depois de ida nee mak ami sei kria fali enkontru ida hodi hili ami nian komisaun ba iha ezame nasional ninia. Nee duni agora daudaun ami seidauk kria komisaun,” dehan nia ba jornalista STL, Tersa (02/09/2025).
Nia afirma, nee duni depois de sira realiza expo iha eskola remata mak sira sei establese komisaun ba ezame nasional nian. Expo nee mak atu hatudu rezultadu ezame nasional pratika nian hanesan labarik balun dezain, servisu hotel nian, nee estudantes sira sei halo simulasaun ida.
Nia hatutan, komisaun ba ezame nasional nian mais tarde Segunda nunee mak sei kria. Total estudantes finalista ba tinan nee hamutuk 58, nee kompostu husi departamentu haat mak hanesan departamentu hotelaria, kulinaria, kustura no ikus liu mak departamentu beleza.
Iha fatin seluk, Diretor ESTV-IT 28 Novembru Bekora, Tomas Pinto afirma, sira forma ona ekipa ba iha ezame nasional ninia, tanba iha tempu badak estudantes sira sei partisipa iha ezame nasional.
Jornalista: Jacinta Sequeira
Editora: Domingas Gomes
