DILI, STLTIMORLESTE.com – Eskola Tekniku Vokasional 28 de Novembru Bekora husu apoiu meza no kadeira ba Ministeriu Edukasaun, hodi tau iha laboratoriu departamentu haat husi eskola refere.
“Meza no kadeira neebe mak ita husu apoiu ba Ministeriu nee laos ba estudantes sira mak atu uza iha sala de aula, maibe ita atu rai iha laboratoriu ba departamentu haat, atu nunee bele rai komputador hodi ita nian estudantes sira tur halao pratika, tanba nee ita presiza meza no kadeira 120, nunee bele fasilita ita nian estudantes sira bele halao pratika,” dehan Diretor Eskola Tekniku Vokasional 28 de Novembru Bekora, Tomas Pinto ba jornalista STL iha nia knaar fatin Vila Verde, Kinta nee (08/05/2025).
Tomas dehan, fasilidade meza no kadeira neebe mak eskola husu apoiu ba Ministeriu Edukasaun bele fasilita estudantes sira, departamentu haat nee mak hanesan, primeiru departamentu arte grafika, eletronika, eletrisidade, jestaun informatika.
Nunee mos Diretor Eskola Hotelaria no Turizmu Becora, Charles F. Guterres dehan, fasilidade meza no kadeira nee mos importante tebes, atu nunee bele tau iha sala pratika sira.
“Meza kadeira nee mos presiza tau iha sala pratika para bele fasilita ita nian estudantes sira iha pratika ninia,” dehan nia.
(jac)
