DILI, STLTIMORLESTE.com – Eskola Tekniku Vokasional (Tekvo) 28 Novembru Bekora, kestiona komputador seidauk sufisiente ba estudantes halao pratika.
Asuntu nee hatoo husi Diretor Eskola Tekniku Vokasional 28 Novembru Bekora, Tomas Pinto ba jornalista STL iha nia knaar fatin Bekora, Kuarta nee (21/05/2025).
“Departmentu arte Grafica nia laboratoriu laran iha 20, Departamentu eletronika nia iha 6, eletricidade laiha, informatika nia laboratoriu. iha 16, ho total hamutuk 42 neebe mak eziste iha Eskola ESTV-IT 28 , mais seidauk sufisiente tuir kada departmentu, tamba lo-loos nee kada departmentu nia laboratoriu presiza 20- 25 komputadores hodi nunee kada departmentu jere nia jestaun laboratoriu rasik, nia manutensaun rasik, atu labele prejudika ba prosesu ensinu aprendizajen durante sala de aula lao normal,” nia deklara.
Iha parte seluk, Diretor Nasional Ensinu Tekniku Vokasional, Fernando Mouzinho Gama hatete, Ministeriu Edukasaun nian objetivu nee atu distribui komputador ba eskola hotu para bele halao buat ida dijitalizasaun nee tenke lao, entaun sira sosa komputador fazeadamente, depois hola mos projetor, atu nunee ba eskola hotu labele uza jis ona, maibe eskola hotu uza ona projetor.
“Ita sosa komputador ba eskola lima, nee ita fahe tan ona, nee ba eskola lima, maibe ba tinan ida nee ita sei sosa komputador no projetor ba eskola tekvo hitu, neebe agora daudaun ninia prosesu iha ona aprovizionamentu, ita sei sosa komputador ba eskola hitu, maibe iha tinan kotuk ita sosa ba eskola lima, tinan nee ba eskola hitu, tinan oin ita sei sosa ba eskola sanolu resin,” tenik nia.
Nunee mos Charles F. Guterres hanesan Diretor Eskola Hotelaria no Turizmu Bekora hatete, komputador ba multimedia nee importante tebes, oinsa mak husi Ministeriu Edukasaun bele fo apoiu komputador ba estudantes sira iha nível ensinu tekniku vokasional, atu nunee estudantes sira bele halao pratika.
“Ita nian estudantes sira tekvo nee presiza halo pratika, tanba nee husi Ministeriu Edukasaun presiza fo apoiu komputador ba ita nian tekvo sira, hodi nunee bele fasilita estudantes sira halo pratika iha eskola,” nia afirma.
(jac)
