DILI, STLTIMORLESTE.com – Instituisaun Midia Suara Timor Lorosae (STL) CORP hetan vizita trabalhu husi estudante Eskola Tekniku Vokasional (TEKVO) Nu. 2 Lospalos, hodi haree besik servisu midia nee.
Vizita husi estudante Eskola TEKVO Nu. 2 Lospalos mai knua STL CORP nee, halao iha Osindo, Kinta nee (21/8/2025), simu direita husi reprezentante CEO STL Corp, atual Supervisor/ Online News & Social Media Manager, Antonio Cesar no Manajer Publisidade/HRD, Marcos da Silva.
Estudante sira nee akompanha husi Xefi Gabinete Apoiu Tekniku (GAT), eskola TEKVO Nu. 2 Lospalos, Jose dos Santos. Iha aprezentasaun, Manajer Publisdade STL Corp, Marcos esplika lalaok servisu iha Midia STL Corp ba estudnate eskola Tekvo Nu. 2 Lospalos.
Manajer publisidade nomos HRD STL Corp nee lori CEO STL CORP nia naran, hatoo agradese ba Xefi GAT eskola TEKVO Nu. 2 Lospalos, Jose dos Santos nomos estudante sira, tanba bele hili STL sai hanesan fatin destinsaun ida, hodi bele aprende no konhese servisu Midia nian.
Iha oportunidade nee mos estudante neebe hetan akompanha husi mestri no mestra nain ida nee, halao vizita ba sala redasaun STL, sala editing video, sala aprezentasaun notisia kalan, sala Master Control Room (MCR), Radio, Design/Lay Out no makina produsaun Jornal STL.
Durante vizita sala hirak nee, estudante sira mos entusiazmu hakarak hatene klean servisu midia nian. Tanba tuir sira, durante nee sira hatene deit teoria, maibe pratika no haree direita fasilidade iha Midia, ida nee foin primeira vez.
Estudante Devimonia Silvia Keyrahu Quadros hateten, durante nee sira hetan deit teoria, maibe ohin loron sira hetan oportunidade diak, tanba bele mai haree direta servisu midia nian, liu-liu iha Jornal, Televizaun no Radio.
“Durante nee ami hetan deit teoria, maibe ohin ami bele haree besik servsiu midia nian lo-loos, no ida nee hanesan esperiensia foun ida mai ami no sai hanesan bukae ba ami nia futuru, hodi dudu ami atu estuda makaas liu tan, tanba buat hotu neebe iha nee, la fasil atu hetan deit,” dehan Devimonia.
Aleinde estudante Devimonia, iha mos estduante seluk nebee antusiazmu hakarak hatene klean servisu midia nian lo-loos, liu husi perguntas nebee sira husu. Sira koriozu tebes haree servisu midia.
Vizita husi estudante Eskola TEKVO Nu. 2 Lospalos nee fahe ba ekipa rua. Ekipa primeiru mak diriji husi Xefi GAT Eskola TEKVO nu. 2 Lospalos, Jose dos Santos no eskipa seluk mos iha estudante nain 22.
Hafoin ekipa primeiru halao vizita mai STL Corp, kontinua halao vizita ba TVE, no ekipa ida nebee antes nee halao uluk vizita ba TVE kontinua mai fali STL CORP.
Vizita ekipa primeiru mai STL nee taka ho Tara Tais ba reprezentante CEO STL Corp, atual Supervisor/ Online News & Social Media Manager, Antonio Cesar, hanesan lembrasan husi estudante sira, no hasai foto hamutuk iha edifisu STL Corp. Vizita ekipa daruak mos taka ho foto hamutuk.
(jos)
