DILI, STLTIMORLESTE.com – Estatutu ba Guarda Prizional sira nian haruka ona ba iha Prezidensia Konselhu Ministru, no hein halao re ajendamentu hodi tama ba iha faze diskusaun.
Diretor Nasional Servisu Prizional no Reinsersaun Sosial (DNSPRS), Delfio Soares Alves hatete, husi sira nia parte haruka ona ba iha Prezidensia Konselhu Ministru.
“Estatutu Guarda Prizional nian Diresaun Nasional halao ona nia papel, hamutuk ho Diresaun Lejislasaun Ministeriu Justisa, haree hotu ona, agora iha ona Gabinete Prezidensia Konselhu Ministru, hodi halo re ajendamentu ba iha Konselhu Ministru,” dehan nia ba STL iha Kaikoli, Kuarta (03/09/2025).
Tuir nia, ba oin sei hein deit rezultadu neebe iha, tanba nee se rezultadu iha ona bele hakat ba iha diskusaun.
Iha fatin ketak, Diretor Prizaun Gleno, Cristiano Salsinha sujere atu parte relevante haree kona-ba estatutu Guarda Prizional sira nian, tanba balu servisu kleur ona, maibe seidauk iha estatutu hodi regula sira.
“Ami sujere atu hare ba iha estatutu nee oinsa bele iha solusaun, tanba Guarda barak servisu kleur balu servisu to mate, maibe seidauk iha estatutu ida hodi regula,” dehan nia.
Diretor nee tau konfiansa ba iha Ministru Justisa hodi buka solusaun ba iha kestaun nee, tanba estatutu Guarda Prizional (GP) sai mos hanesan parte importante ida atu regula guarda sira konaba grau neebe iha.
Aleinde nee, Ministru Justisa, Sergio Hornai hateten, kona ba estatutu Guarda Prizional nian sei haree mos, atu iha ona ajenda bele halo diskusaun. “Hanoin sei haree hotu tanba nee kuandu iha ona nia ajenda, sei halo diskusaun,” dehan nia.
Entretantu tuir dadus neebe iha, oras nee daudaun Guarda Prizional iha Prizaun Bekora, Suai, Gleno ba Guarda tuan hamutuk 204, no guarda foun hamutuk 72.
Jornalista: Terezinha de Deus
Editora: Carme Ximenes
