DILI, STLTIMORLESTE.com — Konstrusaun estrada husi area Kristu Rei ba Dolok Oan remata ona, maibe seidauk bele loke ba publiku, tanba kontrusaun faze segundu nian sei kontinua hodi liga estrada diresaun Kristu Rei nian ho diresaun Hera neebe seidauk finaliza.
Tuir Agapito Inacio da Costa katak, konstrusaun obra estrada Dolok oan nian neebe kaer husi Kompania Carya Timor Leste LTD) ho kustu milhaun US$4 seidauk remata, konstrusaun nee inisiu anziidu oituan tanba atu simu vizita Papa Francisco matebian, iha Setembru 2024 liuba, maibe obra nee kontinua ba segunda faze, tanba atu liga ba estrada diresaun hera nian.
“Obra segundu faze nian nee seidauk hotu, traballador sira sei kontinua servisu hela, nunee estrada ba dolok oan seidauk bele loke ba publiku,” dehan Agapito ba STL iha areador Kristu Rei, Segunda (26/1/2026).
Agapito hatete desde inisiu konstrusaun, traballador sira servisu loron kalan hodi bele atinji lalais tarjetu tuir kontratu, konsege finaliza, nee laos ba konstrusaun deit, iha programa seluk kuda aihoris iha area kristu rei nian, para rai bele matak, programa kuda aihoris nee mos lao diak, ai oan sira daudaun moris ona, hein katak tinan hirak mai area kristu rei nian sei matak, tanba aihoris.
Nia informa katak halo estrada iha tasi ibun, nee laos servisu neebe kaman, tanba liga ho tasi, kuandu anin boot, udan no tasi sae, provoka ondas boot, semente cor sira nakloke hotu, tenke cor fali, nunee servisu iha tasi ibun hadau malu ho ondas.
“Ami tau tembok jari jari iha tasi ibun nee para sata deit ondas, tanba bainhira anin ondas boot, estraga hotu semente neebe ami foin cor, nee ami tenke servisu dalarua,” nia relata.
Konstrusaun estrada Kristu Rei tuir nia ligadu ho planu governu nian atu implementa taxa entrada, nunee sei halo mos postu iha portaun iha parte Metiaut nian no mos portaun iha parte Hera nian, sidadaun neebe hakarak tama, hodi utiliza fasilidade sira iha area turismu kristu rei nian tenke selu taxa.
“Hau lahatene estrada nee sei uza ba transporte publiku, ka lae, mas informasaun neebe hau rona, katak ema sira tama iha nee tenke selu,” nia tenik.
Entretantu tuir observasaun STL iha terenu nota katak estrada ba parte dolok oan nian daudauk sei taka hela ba publiku, monta ona portaun iha areador Kristu rei nian, iha mos seguransa husi kompania carya Timor Leste nian hodi kanaliza motor no kareta neebe hakarak hakat ba estrada dolok ona nian ka atividade servisu neebe lao daudaun.
Nunee mos sidadaun neebe hakarak halo exersisiu ba area dolok oan admite tama mas lao ain deit, enkuantu kareta ka motor ladmiti tama. Nunee mos peskador sira hakarak ba kail ka soe dai iha tasi area Kristu rei nian, lao ain deit ba laran, enkuantu kareta ho motor para hotu iha areador Kristu rei nian.
Mas veikulu kompania nian no ema sira neebe servisu ba konstrusaun tama ho autorizasaun husi seguransa portaun nian, kareta ka motor bele tama ba area dolok oan nian, tanba seguransa iha portaun mak sei fikxa se mak bele tama no se mak labele.
(god)
